រឿង អ្នកជម្ងឺទី1
(ភាគ4)
និពន្ធដោយ Wong Nau
នៅសប្តាហ៍បន្ទាប់ខ្ញុំសំរេចចិត្តនិយាយរឿងធ្វើចិត្តអោយសប្បាយៗ
ខ្វល់តិច អោយគាត់ស្តាប់ ព្រោះគិតថារឿងនោះវាសុីទៅនឹងស្ថានភាពរបស់គាត់។
🧔សួស្តីធារិត
🧒 បាទសួស្តីលោកគ្រូ
🧔មើលទៅដូចជារីករាយជាងមុន
🧒 ធម្មតាតើលោកគ្រូ
🧔ធម្មតាមានន័យថា រាល់ថ្ងៃគឺសប្បាយចិត្តចឹងហ៎?
ធារិតគេធ្វើអៀនៗញឹមៗរួចតបវិញ
🧒 អត់ដឹងដែរលោកគ្រូ ខ្ញុំគិតថាខ្ញុំធម្មតា
🧔ប្អូនខ្លួនឯងមើលមិនដឹងទេ តែមនុស្សជុំវិញក្មួយគេ
មានអារម្មណ៍ដឹងបាន តាមទឹកមុខការសម្តែងរបស់ប្អូន។
ធារិតគេញក់ចិញ្ចើម... ដូចលួចគិតអីម្យ៉ាង
🧒 បែបមានតែលោកគ្រូដឹងដែលគិតចឹង...(គាត់និយាយតិចៗ)
🧔បើប្អូនអត់ជឿប្អូនមានបានសង្កេត
អត់ថាមនុស្សជុំវិញប្អូនភាគច្រើន គេបង្ហាញភាពរួសរាយ ឬ ស្វាគមន៍ប្អូនច្រើនជាងពីមុន?
🧒 ដូចធម្មតាលោកគ្រូអត់មានប្លែកអីផង
🧔 អើ
ឥលូវបើប្អូនចេះតែនិយាយពីរឿងធម្មតាៗចឹងប្អូនដឹងអត់ថា អាភាពធម្មតានឹងហើយ គឺរឿងល្អ
ប្អូនដឹងអត់ថា មនុស្សច្រើនតែមើលរំលងក្តីសុខ នៃភាពធម្មតានេះណា
🧒 លោកគ្រូនិយាយមកខ្ញុំអត់សូវយល់ទេ
🧔 ប្អូនធ្លាប់លឺគេនិយាយថា
ជីវិតកាន់តែសាមញ្ញក្តីបារម្ភខ្វល់ខ្វាយកាន់តែតិចទេ?
ធារិតងក់ក្បាលយឺត អ៎
🧔 គេថាមនុស្សកាន់តែក្បូរក្បាច់ច្រើន គឺកាន់តែបង្ហាញថា
គាត់គ្មានក្តីសុខក្នុងជីវិត។
🧒 មេចចឹងវិញ🤔
🧔 ងាយយល់ទេ! ឧទាហរណ៍ រឿងញាំមួយចុះ បើគាត់រអ៊ូថា
ញាំតែសម្លម្ជូរ គាត់ទ្រលាន់ញាំមិនចូល ចឹងគាត់កុម្មង់ ស្តេកលើជ្រុញ, កុម្មង់ស្រាក្រហមថ្លៃៗ,ចង់ទៅអង្គុយក្នុងហាងស្អាតៗ
មានតន្ត្រីអីៗជាដើម។ នោះគឺមកពីគាត់មិនមានក្តីសុខនូវអ្វីដែលគាត់មាន
ទើបគាត់ខំចំណាយលុយបន្ថែម ដើម្បីស្វែងរកក្តីសុខ អោយបានពេញចិត្តរបស់គាត់។
អាការថែមនេះថែមនោះ គឺគេហៅថា ក្បាច់ក្បូរ ចង់បានសុខស្រួលផង
ចង់អោយបង្អួតភ្នែកគេឯងផង ចង់អោយជីវិតសុីវិល័យ ស្គាល់រស់ជាតិជីវិតបែបហាយសូ...។
ដែលទាំងអស់ណឹងសុទ្ធតែជារបស់ក្រៅខ្លួន សួរថា វាពិតជាក្តីសុខ ឬក៏ ជាសម្ពាធ?
នៅពេលណាដែលយើងមិនមានរបស់ទាំងនោះ យើងនឹងមានអារម្មណ៍ថា
ជីវិតយើងហាក់គ្មានន័យ លែងមានក្តីសុខ។ ហេតុអ្វីទៅ? ព្រោះយើងធុញនឹងសម្លម្ជូ
ទៅហើយ ចង់មិនចង់ត្រូវបង្ខំខ្លួនឯងអោយប្រឹងប្រែងរកលុយដើម្បី ដូរកក្តីសុខ។
អាបែបណឹងហើយគេហៅថា សម្ពាធមិនមែនក្តីសុខទេ។
🧒 តែ teacher Ton បង្រៀនពួកខ្ញុំ
អោយ shoot the Moon! គាត់ថាមនុស្សប្រាថ្នាទាប
មិនអាចធ្វើខ្លួនអោយបានខ្ពស់ទេ។
ខ្ញុំញញឹមតិចៗទៅកាន់ធារិត ព្រោះខ្ញុំពីមុនក៏យល់ច្រលំនឹងពាក្យនេះដូចគ្នា។
ខ្ញុំគិតថាមនុស្សបើគ្មានគំនិតចង់មានបាន
ថ្កុំថ្កើងជាងគេទេនឹងរស់នៅអន់ជាងគេរហូតហើយ។ ការយល់នេះវាអត់ខុសទេ
តែវាខុសនូវវិធីដែលធ្វើ។
🧔ធារិត លោកគ្រូស្តាប់ឯងលើកយកទ្រឹស្តី shoot the
moon មក ធ្វើអោយលោកគ្រូនឹកដល់អតីតកាលរបស់លោកគ្រូកាលពីមុន។ ប្អូនដឹងទេ
នៅពេលលោកគ្រូលឺពាក្យនេះ កាលពីនៅរៀនថ្នាក់ត្រៀមចូលមហាវិទ្យាល័យ
(ភាសាបរទេសលោកគ្រូអន់ពេក) លោកគ្រូបែរជាយល់ច្រលំដូចប្អូនពេលនេះចឹង គឺគិតធំ
គិតខ្ពស់ មិនធ្លាប់គិតថា នឹងធ្វើអ្វីអន់ៗទេ។ លោកគ្រូបែជាធ្វើខ្លួនអោយខ្ពស់
ដើម្បីឈោងអោយដល់ព្រះចន្ទ។ វាជាការខុសឆ្គងផ្លូវគំនិតក្នុងជីវិតលោកគ្រូ
ហើយសូម្បីឥលូវនេះពេលខ្លះគ្រូក៏ទទួលរងឥទ្ធិពលវានៅឡើយ ។
គឺអោយតែលោកគ្រូធ្លាក់ខ្លួនក្នុងស្ថានភាពលំបាក លោកគ្រូពិបាក ដាក់ខ្លួនទទួលយកវាណាស់។
🧒 វាយល់ខុសមេចទៅលោកគ្រូ?
🧔គឺមនុស្សយើងគេអោយសម្លឹងខ្ពស់
តែត្រូវចាប់ផ្តើមពីតូចពីទាបទៅ មិនមែនសម្លឹងខ្ពស់ហើយតម្កើនឬកពារ
ខ្ពស់ដូចច្បាប់ស្រូបទាញបច្ចុប្បន្នណឹងទេ។ សម្លឹងខ្ពស់ ក៏មិនមែន
អោយគិតថាទាល់តែរបស់ល្អ (ប្រេនបានសមនឹងខ្លួន)
មិត្តភត្តិទាល់តែអ្នកជាន់ខ្ពស់បានសមនឹងរាប់ទេ ការងារបើមិនបានមុខមាត់
មានឱកាសធំដុំមិនខ្ចីធ្វើមិនខ្ចីពាល់ទេ។ សម្លឹងខ្ពស់មិនមែនធ្វើខ្លួនអ្នកអោយខ្ពស់លើសគេនោះទេ។
យើងសម្លឹងខ្ពស់ រំពឹងខ្ពស់ ក្នុងការកសាងសម្ថភាពយើង សាងខ្លួនឯងតើ
មិនមែនសាងរូបភាពអោយអ្នកផងមើលមកយើងថាខ្ពស់ទេ។
អ្វីដែលអ្នកដទៃមើលមកយើងគឺអាចកែរបានគ្រប់ពេល នៅពេលណាយើងអាចកែរប្រែខ្លួនឯងបាន។
យល់ឬនៅ ធារិត?
🧒 ចឹងមានន័យថា ព្រះចន្ទគឺជាគោលដៅសំរាប់យើងមិនមែនសំរាប់អោយអ្នកដទៃមើលមកយើងថាខ្ពស់ស្មើព្រះចន្ទទេ។
🧔 👍👍👍ត្រឹមត្រូវហើយប្អូន...។
នៅពេលយើងមានសម្ថភាព ក្នុងខ្លួន យើងមិនចាំបាច់ខ្វល់ថាអ្នកសើចចំអកយើងទៀតទេ
គេចង់គិតមេចស្រេចតែគេ យើងដឹងច្បាស់ថា យើងល្អជាងខ្ពស់ជាងម្នាក់នោះ។
ឥលូវយើងងាកមករឿងអត្ថប្រយោជន៍ នៃការរស់នៅបែបសាមញ្ញៗបន្តវិញ។ ការរស់នៅសាមញ្ញ
គឺការធ្វើអោយជីវិតងាយស្រួលក្នុងការចាប់យកភាពរីករាយ ខ្វល់ខ្វាយតិច។
ស្គាល់ពីភាពខុសគ្នារបៀប ពាក្យថាតម្រូវចាំបាច់ និង ការចង់បាន។
ដូចប្អូនចឹង...ប្អូនចង់បានម៉ូតូ ព្រោះមានតម្រូវការ ចាំបាច់ទៅរៀន...
តែសួរថា កង់អាចបំពេញភាពចាំបាច់បានឬទេ? បើបានគួរតែរីករាយប្រើប្រាស់កង់
ដែលយើងមានលទ្ធភាពទិញបាន។ ជាជាងទោម្នេញ ចង់បានម៉ូតូដែលតម្រូវអោយប្អូន
ជំពាក់គេជំពាក់ឯង ទិញហើយ ចំណាយលើសាំង ចំណាយថែរទាំជួសជុលលាងសំអាត
ទៅណាត្រូវផ្ញើខ្លាចបាត់...។ សួរថាប្អូនចង់បានម៉ូតូ តើវាចាំបាច់ទេ បើកង់ក៏ប្រើបាន?
🧒 យល់តើលោកគ្រូ លោកគ្រូចង់កុំអោយខ្ញុំ
សម្ភារៈនិយមពេកមែន?
🧔មែនហើយប្អូន បងបារម្ភថា ប្អូនឃើញគេមានរបស់ល្អៗប្រើ
ហើយប្អូនគ្មាន វាធ្វើអោយប្អូន កើតទុក្ខទោម្នេញ។ ដែលតាមពិតទៅ
របស់ថោកៗល្មមៗក៏អាចប្រើបានដូចគ្នា ហើយរបស់ណាដែលមិនចាំបាច់
តើយើងប្រឹងយកមកទុកដាក់នាំខ្វល់រក្សាច្រើនធ្វើអ្វី។ ប្អូនអាចប្រាប់បងបានអត់ថា
រាល់ថ្ងៃចង់បានអ្វី ហើយមិនបានដូចចិត្ត?
🧒 អត់មានចង់បានអីទេ ព្រោះគ្មានលុយទិញដដែល
🧔ល្អណាស់ប្អូនដែលចេះគិត ពេលប្អូនគិតចឹង
ប្អូនក៏អត់សូវស្ត្រេស ហើយអាចមានអារម្មណ៍រីករាយក្នុងការងារប្រចាំថ្ងៃ។
បងបារម្ភខ្លាចប្អូន ពិបាកចិត្តព្រោះគ្រួសារក្រ ខ្មាស់គេ ខ្លាចសង្គម...។
ទើបបងខំពន្យល់ប្អូនអោយយល់ពីចំនុចណឹង។ យើងក្រហើយ
មានអីដែលត្រូវខ្មាស់ការងារអីក៏យើងធ្វើបាន, ស្លៀកពាក់អោយតែសមភ្នែកទៅ
មិនបាច់ហុឺហាអីទេ យើងជាសិស្សតើ កុំខ្លាចអ្នកមាន ខ្លាចសង្គម
អោយតែយើងរស់នៅដោយសេចក្តីថ្លៃថ្នូ មានសុជីវធម៌ ចេះគោរពគេឯង ដាក់ខ្លួន
នោះសង្គមមនុស្សជាន់ខ្ពស់(អ្នកចេះដឹង)គេអោយតម្លៃហើយ។
តែបើក្រុមមនុស្សដែលប្អូនស្គាល់គេ មើលងាយប្អូន ដៀលអារហាម
អាសំរាមអីទាំងដែលយើងអត់សុំលុយគេចាយ អត់ប៉ះពាល់គេផង
ក្រុមមនុស្សទាំងនោះទៅវិញទេដែលថោកទាប មិនសមប្អូនទៅរាប់រកទៀតឡើយ។
🧒 បងអោយខ្ញុំកាត់ចិត្តនឹងរបស់ល្អៗចឹង
វាអាចធ្វើអោយខ្ញុំ លែងគិតធំ លែងចង់មានបានបាត់ហើយលោកគ្រូ?
🧔 ម្តងទៀតជាថ្មី។ ប្អូនចង់លោភចង់មានបាន
លុះត្រាតែប្អូនមានសម្ថភាព ឥលូវនេះប្អូនផ្តោតលើការកសាងសម្ថភាព
មិនមែនផ្តោតលើសម្ភារៈនិយមទេ។ ថ្ងៃក្រោយពេលប្អូន
មានលទ្ធភាពរកសុីធ្វើការមានលុយច្រើន ប្អូនចង់ស្វែងរកក្តីសុខផ្សេងៗដែលប្អូនធ្លាប់គិតបានហើយ។
តែពេលនេះគិតទៅបានតែពិបាកចិត្ត ព្រោះនៅមិនទាន់មានសម្ថភាពនៅឡើយ។
បងជឿថាពេលប្អូនទម្លាប់ក្នុងការរស់នៅសាមញ្ញហើយថ្ងៃក្រោយទោះប្អូនក្លាយជាអ្នកមាន
ក៏ប្អូន មិនភ្លេចកំណើតខ្លួនដែរ ឬដែលគេហៅថា ឈ្លក់ទឹកម៉ាសុីន។
ក្រោយពីនិយាយគ្នាចប់ ខ្ញុំមើលទៅធារិត ដូចជា រាងពិបាកចិត្តទៅវិញ។
ឬមួយការដែលខ្ញុំរំលឹកគាត់ថា គាត់ក្រ គាត់គួរជិះត្រឹមតែកង់
និងប្រើប្រាស់របស់របរចេះគិត កុំខ្ជះខ្ជាយ វាដូចជាខ្ញុំ វាយតម្លៃគាត់? ខ្ញុំហាក់ទាក់ទើរក្នុងចិត្តដូចអត់ច្បាស់ខ្លួនឯងថា
តើធារិតគេពិតជាយល់ចេតនាខ្ញុំឬអត់? ឬខ្ញុំឆ្កឹះដំបៅអន់ចិត្តរបស់គាត់អោយរបកក្រហាយឡើងវិញ?
ហុឺខ្ញុំអើយខ្ញុំ ចង់និយាយអោយក្មេងរឹងមាំ
បែរជានិយាយអោយគ្នាគិតច្រើនទៅវិញ... អាមេចចេះ អាcounselor បរាជ័យអើយ!
អាយ៉ាប់! ចូលចិត្តសាំញាំណាស់.....!
ថ្ងៃនោះមានកម្មវីធីនៅអង្គការ គឺជប់លៀងអោយអ្នកសហគមន៍ ធ្វើរាល់ខែ។
ខ្ញុំនៅបន្តគិតពីរឿងធារិត បណ្តើរលេង FB បណ្តើរ
ក្នុងបរិយាកាស ដ៏ថ្លង់ នៃសម្លេងបាស សម្លេងពិធីករ និង
សម្លេងហ៊ោកញ្ជ្រៀវរបស់ក្មេងៗ។ បុគ្គលិកដែលជាអតិថិជន
(គាត់ជាអ្នកសហគមន៍ដែលអង្គការហៅអោយជួយការងារ)
គាត់តែងយកចំណែកអាហារមកចែកខ្ញុំនិងម៉ាក់ខុម អោយតែដល់ថ្ងៃណឹង ព្រោះពួកគាត់ស្រលាញ់ម៉ាក់ខុម
ដែលជួយដោះស្រាយរឿងរ៉ាវ វិបត្តិអោយឯខ្ញុំវិញ បានសុីចុក តោងបងខុមណឹងឯង
បើយកតែមួយអោយបងខុម ដូចមិនទំនងព្រោះមាន2នាក់😜 ក្រោយពីញាំនំ ញាំសម្លគេ (នំបុ័ងការី)គេហើយ ខ្ញុំនៅរហូតដល់ម៉ោង 7 យប់ ទើបចេញពី office។ ចៃដន្យអី
ខ្ញុំជួបធារិតនៅចំណតម៉ូតូ។
🧔 ធារិតហើយទើបនឹងទៅផ្ទះមែនណឹង?
🧒 បាទលោកគ្រូ ខ្ញុំនៅជួយគេទៅបានអាហារមួយថង់ដែរ 😜 ចុះលោកគ្រូថ្ងៃណឹងនៅយប់មេស?
🧔 បែបដូចប្អូនដែរហើយ ចាំញាំអាហារ ស្នាដៃបងសំណាង
(ចុងភៅប្រចាំអង្គការ)។ និយាយចឹងធារិត ថ្ងៃនេះ ប្អូនមានអន់ចិត្តនឹងបងអត់?
🧒 អន់ចិត្តរឿងអីបង?
🧔សួរថាមានឬអត់? រឿងអីក៏ដោយ?
ធារិតគ្រវីក្បាល
🧔ថ្ងៃនេះបងរំលឹកពីភាពក្រីក្រ របស់ប្អូន
បងខ្លាចប្អូនមិនយល់ចេតនាបង ហើយគិតរឿងទាំងនោះដាក់ក្នុងចិត្ត។
ថ្ងៃនេះយើងក្រតែមិនមែនក្ររហូតឯណាប្អូន វាសនាមើលមិនឃើញទេ។
ដើម្បីបានល្អទាល់តែយើងសប្បាយចិត្ត រាល់ថ្ងៃៗ ថ្ងៃណាក៏ជាថ្ងៃល្អអោយតែយើងសប្បាយចិត្ត...
ដើម្បីសប្បាយចិត្តទាល់តែយើងរៀនពេញចិត្តនូវអ្វីៗសាមញ្ញៗក្បែរៗខ្លួន។
🧒 លោកគ្រូ ពេលលោកគ្រូសួរថាខ្ញុំចង់បានអ្វី? ពេលណឹងខ្ញុំនឹកអត់ឃើញទេតែពេលខ្ញុំនឹកឃើញ
ទើបដឹងថាវាធ្វើអោយខ្ញុំអត់សប្បាយចិត្ត វាដូចរនាំងឃាំងមិនអោយសប្បាយ។
🧔វាជាអ្វីទៅប្អូន?
🧒 លោកគ្រូចង់ដឹងទាល់តែសន្យាជាមួយខ្ញុំសិនថា
បើខ្ញុំនិយាយទៅ ទោះពេញចិត្តឬមិនពេញចិត្ត លោកគ្រូហាមខឹងខ្ញុំ ហើយហាមប្រាប់អ្នកណា
ដឹងតែលោកគ្រូនិងខ្ញុំបានហើយ។
ខ្ញុំញាក់ស្មា ងាកក ជាសញ្ញាថា វាគ្មានបញ្ហាអ្វីទេ
🧒 សុំថ្ពក់ដៃសិនបានខ្ញុំនិយាយ
🧔អូខេបាន
🧒 តែឥលូវយប់ហើយ កុំរំខានលោកគ្រូ
ចាំស្អែកខ្ញុំប្រាប់លោកគ្រូចុះ
🧔មេចចឹង ស្មានតែឥលូវ? រឿងច្រើនមែន?
🧒 បាទបើនិយាយទៅវាយូដែរ ចឹងចាំស្អែកបានអត់លោកគ្រូ?
🧔ណឹងហើយ ស្រេចតែចិត្តប្អូនទេ ពេលណាប្អូនគិតថា
ស័ក្តិសមចាំប្អូននិយាយចុះ។ គ្រូទៅផ្ទះហើយ បាយ
🧒 បើកបរប្រយត្នផងលោកគ្រូ ភ្នែកម្ញ៉ូបផង!
🧔យើ... ចេះឌឺទៀត! គ្រូភ្នែកមិនពូកែរ
តែចិត្តគ្រូភ្លឺជាងប្អូន មើលឃើញឆ្ងាយជាងប្អូន... ទៅហើយ។
យប់ណឹងខ្ញុំគេងយល់សប្តិឡើងចង់ធ្លាក់គ្រេ... យល់សប្តិថា
មានកូនពស់វាចូលមុង ហើយចូលក្នុងខោ ទៀត ថាភ្ញាក់ស្ទុះរលាស់ខ្លួន ក្នុងយល់សប្តិ
តែការពិត បំរាស់ ប៊ិះធ្លាក់គ្រែ... ចង់គាំងស្លាប់។
ព្រឹកថ្ងៃចន្ទ ក្រោយពីបង្រៀនក្មេងៗចប់ ខ្ញុំឆ្លៀតចូល office
អង្គុយជជែកនឹងបងខុម បន្តិចហើយក៏ឆ្លៀតឆែក mail មើលផងដែរ។ ក្នុងប្រអប់សាររបស់ខ្ញុំមាន 3សារ
មិនទាន់អាន។ 2 មកពីខាងអប់រុំ និយាយពី agenda ប្រជុំគ្រូៗ Part time មួយទៀត និយាយពី
កាលវិភាគនិងម៉ោងបង្រៀនថ្មី។ ចំណែកឯមួយទៀតនោះគឺ មកពីធារិត ដោយ2ខាងលើចាំមើលពេលក្រោយក៏បាន ខ្ញុំចូលមើលសារ របស់ធារិតមុនគេ។
ហើយសំណេររបស់គាត់គឺមានដូចខាងក្រោមនេះ
អរុណសួស្ដីលោកគ្រូ....
កាលពីយប់មុិញខ្ញុំថាមានរឿងចង់ប្រាប់លោកគ្រូ តែខ្ញុំគិតយូណាស់
ហើយគិតថា សរសេរជាសារគឺវាងាយស្រួលជាង និយាយប្រាប់ផ្ទាល់។
មុននឹងសរសេរបន្តខ្ញុំសូមរំលឹក ពីការសន្យារបស់លោកគ្រូនិងខ្ញុំថា
មិនប្រាប់ដល់បុគ្គល់ទី3ទេ ដឹងតែយើងពីរនាក់ទេ។
ខ្ញុំដាច់ចិត្តនិយាយក៏ព្រោះតែខ្ញុំជឿថា លោកគ្រូជាមនុស្សគោរព វិជ្ជាជីវៈជា counselor។ ហើយវាគឺជាក្តីកង្វល់ក្នុងចិត្តខ្ញុំពិតមែន។
នៅពេលលោកគ្រូនិយាយពីបញ្ហាជីវភាព ខ្ញុំពិតជាមិនបានខឯងអន់ចិត្តអីនឹងលោកគ្រូទេ
តែមានរឿងមួយពេលដែលខ្ញុំគិតដល់គឺ តូចចិត្តតែម្តង។ ខ្ញុំដឹងថាខ្ញុំកូនអ្នកក្រ
ខ្ញុំមិនសមណាទៅស្រលាញ់អ្នកដឺលខ្ញុំឈោងមិនដល់ទេ។ តែខ្ញុំគិតហើយគិតទៀតថា
ខ្ញុំចង់ប្រាប់គេអោយអស់ចិត្តគេគិតយ៉ាងណាក៏ដោយចុះក៏មិនអីដែរខ្ញុំព្រមទទួលគ្រប់យ៉ាង។
ខ្ញុំមិនដឹងថា ហេតុអ្វីបានជាខ្ញុំនៅតែមិនអាចគេចផុតពីរឿងស្នេហា? តាំងពីថ្ងៃដែលខ្ញុំបាននិយាយរឿងរ៉ាវទាំងអស់ប្រាប់លោកគ្រូ នៅឯមាត់ទន្លេ
នោះ ហើយលោកគ្រូពន្យល់ខ្ញុំអោយ ជ្រះស្រលះពី ពូមកពីស្រុកបារាំងនោះមក។ ខ្ញុំហាក់មានអារម្មណ៍ថា
ខ្ញុំបានធូស្រាលក្នុងចិត្តយ៉ាងច្រើន (បាត់ពិបាកចិត្តអស់ពាក់កណ្តាល) ក្តីសៅហ្មង
បានចេញបាត់ពាក់កណ្តាល ជំនួសមកវិញនូវអារម្មណ៍ថ្មី
ដែលខ្ញុំក៏មិនដឹងថាវាជាអ្វីអោយប្រាកដដែរ។ តែក្រោយៗមកទៀត
លោកគ្រូនិងម៉ាក់ខុមបានបន្តជួយណែរនាំខ្ញុំ ធ្វើអោយអារម្មណ៍ប្លែកថ្មីនោះវាកាន់តែរីកធំ
ហើយក្តីកង្វល់ពីមុនកាន់តែរួមតូចជាលំដាប់។
អារម្មណ៍ចម្លែកនោះវាស្តែងចេញមកយ៉ាងច្បាស់នៅពេលដែលលោកគ្រូ
បង្រៀនខ្ញុំអោយស្គាល់ពីឋានៈខ្លួនឯង ស្គាល់ថាគួជ្រើសរើសអ្វីអោយសមនឹងស្ថានភាពខ្លួន
កុំអោយពិបាកចិត្ត។ របស់របរវាលែងសំខាន់ដល់ចិត្តខ្ញុំទៀតហើយ តែសេចក្តីស្រលាញ់ដែលខ្ញុំមានចំពោះលោកគ្រូ
ទើបវាសំខាន់សំរាប់ខ្ញុំ....(ចប់ប៉ាដោយហើយ អញ...
កាំបិតចិតដងឯងហើយអញ-ខ្ញុំនិយាយអោយខ្លួនឯងពេលអានដល់ចំនុចនេះ)។ ខ្ញុំតូចចិត្តគិតថា
ការប្រាថ្នាចង់បានក្តីស្រលាញ់ពីលោកគ្រូ គឺជារឿងពិបាកណាស់មែនទេសំរាប់ខ្ញុំ? តើលោកគ្រូស្អប់ខ្ញុំទេ បើលោកគ្រូដឹងហើយ? ខ្ញុំតែងលួចសប្បាយចិត្តពេលបានជជែក
បានជួបមុខលោកគ្រូ ព្រោះលោកគ្រូធ្វើអោយខ្ញុំមានអារម្មណ៍ ស្ងប់ស្រាលក្នុងខ្លួន
គ្មានក្តីភ័យខ្លាច។ លោកគ្រូសុភាពរាបសារ និយាយស្តីល្អៗ
ធ្វើអោយខ្ញុំចូលចិត្តទាំងមិនដឹងខ្លួន។ ខ្ញុំមិនចង់បានអ្វីច្រើនទេ សុំត្រឹមតែសេចក្តីស្រលាញ់តិចតួចក៏បាន
អោយតែលោកគ្រូព្រមផ្តល់អោយ។ មួយរយៈមុននេះខ្ញុំពិតជាមានក្តីសុខ
ខ្ញុំពេញចិត្តនឹងការស់នៅ ខ្ញុំមានសង្ឃឹម មានទឹកចិត្តខំបន្ត
ក៏ព្រោះតែខ្ញុំទទួលបានកម្លាំងចិត្តពីលោកគ្រូ... លោកគ្រូសំខាន់ចំពោះខ្ញុំ
រហូតធ្វើអោយខ្ញុំមិនចង់បាត់បង់អារម្មណ៍បែបនេះទេ...។ អោយខ្ញុំសុំទោស
បើខ្ញុំនិយាយប៉ះពាល់អារម្មណ៍លោកគ្រូ... ខុសត្រូវយ៉ាងណា សូមលោកគ្រូ
មេត្តាកុំប្រកាន់ខ្ញុំអី🙏🙏🙏🙏🙏🙏🙏 ដោយខ្លាចលោកគ្រូប្រកាន់ទើបខ្ញុំមិនហ៊ាននិយាយផ្ទាល់។
អរគុណណាស់សំរាប់ពេលវេលាកន្លងមក
ធារិត.
(នៅមានត)
No comments:
Post a Comment