អ្វីទៅជាសេចក្តីសុខពិត?

អ្វីទៅជាសេចក្តីសុខពិត?

សេចក្តីសុខពិតនៅត្រឹមចិត្តព្រមទទួលថាគ្រប់់គ្រាន់នេះឯង​។កាលណាអ្នកទៅហួសព្រំដែនកំណត់នេះ​ហើយ​ ក្នុងជីវិត​អ្នកមិនអាចរកសេចក្តីសុខ ឬសេរីភាពរួចផុតការពីការជិះជាន់សង្កត់សង្កិននៃអំណាចតណ្ហារបស់ខ្លួនឯងផ្ទាល់បានឡើយ​ ប្រៀបបាននឹងមនុស្សម្នាក់ភ្លេចរបស់មួយនៅក្នុងផ្ទះខ្លួនឯង​ តែគេច្រឡំដោយគិតក្នុងចិត្តយ៉ាងច្បាស់ថា​ របស់នោះ​ គេបានភ្លេចនៅផ្សារលក់ដូរមួយ។​ គេបានបិទទ្វារផ្ទះ​ ចាក់សោរទ្វារផ្ទះរបស់គេនោះ​ រួចហើយទៅផ្សារដើររករបស់ដែលគេកំពុងតែបាត់នោះ។​ ទោះគេខំរកមួយជីវិតរបស់គេ​ ក៏គេមិនអាចរកបានឬរកឃើញរបស់ដែលគេបាត់ឬគេចង់រកនោះឡើយ។​ យ៉ាងណាមិញ​ មនុស្សដែលមិនស្គាល់នូវក្តីសុខដែលកើតពីការល្មម​ ដែលជាធម៌កំណត់ដឹងបានក្នុងចិត្ត​ ក្រោយគេបានច្បាំងឈ្នះតណ្ហាផ្ទាល់ខ្លួនគេនោះទេ​ ក្នុងជីវិតរបស់គេមិនដែលបានស្គាល់នូវរសជាតិអារម្មណ៍ដែលមានសេរីភាពពេញបរិបូរណ៍​ ដែលជាសេរីភាពផ្លូវចិត្តនៃការច្បាំងឈ្នះតណ្ហាផ្ទាល់ខ្លួននោះឡើយ។ ពេញមួយជីវិតរបស់គេ​ គេរស់តែក្រោមអំណាចនៃការគាបសង្កត់របស់តណ្ហាផ្ទាល់ខ្លួនគេយ៉ាងវក់វីរកទីបំផុត​ និងរកពន្លឺជីវិតមិនឃើញឡើយ។​

នៅមានមនុស្សមួយក្រុមទៀត​ ដែលមិនបានកំណត់ដឹងថាត្រឹមណាជាការសមល្មមគ្រប់គ្រាន់សំរាប់ជីវិតខ្លួនដែរ​ គឺថាខ្លួនគ្មានអ្វីទាំងអស់ខ្វះមុខ​ខ្វះក្រោយ​ លំបាកវេទនាណាស់ក្នុងជីវិត​ តែគេក៏ពោលថាគេមានជីវិតសមល្មម​ លុយមិនសំខាន់ទេសំរាប់ជីវិតគេដែរ។​ មនុស្សប្រភេទនេះក៏ពិបាកនឹងអោយគេបានរកឃើញសេរីភាពនៃការរួចផុតការជិះជាន់សង្កត់សង្កិនរបស់តណ្ហាខ្លួនគេដែរ​ វាជាជីវិតអត់ពន្លឺងងឹតសូន្យឈឹងមួយបែបទៀតដែរ។​

ការសមល្មមដែលជីវិតគួរកំណត់ដឹង​ និងទទួលយកដើម្បើអោយជីវិតបានស្គាល់រស់ជាតិនៃសេរីភាពដែលគ្មានអ្នកណាអាចដាក់សម្ពាធបាននោះ​ គឺការគ្រប់គ្រាន់នៃបច្ច័យបួនសំរាប់ជីវិត​ ហើយចិត្តទទួលដឹងនិងទទួលយកកំរិតនោះជាចំណុចឆ្អែតនៃជីវិត​ ជាសន្តិភាពកំពូលនៃជីវិត​ ជាការរកឃើញនិងទទួលបានដ៏អស្ចារ្យសំរាប់ជីវិត។​ ការគ្រប់គ្រាន់នៃបច្ច័យបួនសំរាប់ជីវិត​ គឺជាកូនសោរគន្លឹះនៃសន្តិភាពលោកិយនៃជីវិតជាបុថុជ្ជន។​ ការរកឃើញ​ និងចិត្តទទួលយកបាននូវភាពសមល្មមនៃតំរូវការសំរាប់ជីវិត​ ហើយនិងបានបំពេញបាននូវការត្រូវការចាំបាច់សំរាប់ជីវិត​ គឺជាជោគជ័យធំមួយសំរាប់ជីវិតជាមនុស្សដែលមិនងាយពេកទេ​ សំរាប់មនុស្សក្នុងការទទួលបានជោគជ័យជីវិតមួយនេះក្នុងជីវិតរបស់ពួកគេ៕

By_Mr_Khem_Veasna